香港男仔髮型：推介14款港男臉型2023流行髮型 日式韓式瀏海

[髮型2023]

髮型2023男｜髮型對香港男士嚟講好重要，千祈唔好以為扮靚變髮只係女仔專利！男士髮型唔單止令自信增加，更可改變其他人對你嘅第一印象，增加好感（特別係女神！）。其實男士髮型不是只有「軍裝頭」、「剷青」、「All back」等，男生造型都可以很多變化！每年潮流髮型都不同，等Toby 話你知今年最新流行嘅男士髮型趨勢！無論係短／中／長髮，想搵韓風髮型、日系髮型、或歐美系髮型風格，Toby 已整合14個流行男士髮型推介，跟著流行髮型趨勢改變下造型啦！

男士髮型推介

1. 歐美 Allback 髮型

比較少男仔會選擇全 Allback髮型，因為並唔係每一位男生都可以carry到Allback髮型！有啲亞洲男士髮線較高，甚至乎有M字額嘅情況，又或者擔心露出整個額頭會唔好睇，所以無信心整 Allback 髮型。

不過，相信唔少男仔其實都心思思，想試吓ABC風 Allback 髮型。1516嘅你，可以試吓用兩邊髮量遮蓋額頭，在中間位置找出不同紋理嘅方向，就可以 Allback 製造乾淨感覺啦！

男士歐美 Allback 髮型 - Credits to Yonda Hair

2. 男士日式寸頭

在男士角度，很多人會做漸變短髮（Fade）時，會以外國嘅 barber 風格作參考，但以日式方向創作出來嘅「男士日式寸頭」，其實更適合亞洲人。日式寸頭可以解決亞洲人額頭短嘅缺陷，突出返髮型立體感覺，利用頂部厚薄度的層次，連接fading部份 ，強調漸變短髮嘅特色！想試吓日式寸頭嘅男士，不妨到日式髮型屋搵髮型師設計造型！

男士日式寸頭 - Credits to Yonda Hair

3. 韓式九一分界髮型

參考韓式男士髮型，總係可以突破傳統思維！「九一分界」多數以女生為準，但當男士做九一分界髮型時，原來都work！韓式九一分界髮型可以突出男仔面形，呢個髮型就最適合較方形嘅臉形，突出整體五官線條！

男士韓式九一分界髮型 - Credits to Yonda Hair

4. 男士韓式中分髮型

近期有好多不同男士都會選擇中分髮型，因為可以解決額頭短嘅問題，同時中分是最近韓式髮型嘅大熱！以中分為基礎，髮型可以有不同變化；而較多層次嘅中分髮型，可以突顯立體感，解決頭型扁嘅問題。

Credits to Yonda Hair

5. 男士瀏海層次髮型

男士瀏海層次髮型以不同瀏海造型帶出層次效果，除咗可以突出個人風格，更可讓面形顯瘦，亦適合唔同風格配搭。要整出男士瀏海層次髮型，你可以利用内部層次結構調走髮量，增加頭髮豐盈感！

男士瀏海層次髮型 - Credits to Yonda Hair

6. 男士中分紋理燙

燙髮亦係今年大流行嘅人氣男士髮型，但男士燙髮有好多種，而「紋理燙」係其中一種。紋理燙係攣度上比較小，作用可以解決頭髮扁塌問題，同時亦唔會顯老，亦相對大眾化，屬於較簡約嘅造型，適合任何人士！

男士中分紋理燙 - Credits to Yonda Hair

7. 男士韓式逗號頭

韓風一直喺香港蔓延，唔少韓星更係香港女士心目中嘅男神，甚至係老公(FF)。而韓仔之所以咁受歡迎，其中一個原因就緊係佢哋嘅造型啦！造型不外乎髮型，就好似韓式Oppa「逗號頭」咁，熱潮喺2018年一路延續到今日。

「韓式逗號頭」髮型有兩種玩法，一係將左右兩邊頭髮以二八或六四嘅比例分界，再將兩邊瀏海向內捲成「C」字形；二係將頭髮比例較多的一邊瀏海向內捲，再將剩餘嘅另一邊向後吹並整齊梳好。各位男士可以問吓專業髮型師嘅意見睇吓邊種啱自己多啲！

韓國男生「逗號頭」- Credits to Ettoday

8.七分復古油頭造型（Side Part）

「 七分復古油頭 」又稱「 飛機頭 」，由貓王 Elvis Presley 喺50年代帶起潮流，呢種經典復古風格被定為英倫風。七分復古油頭髮型帶拋物線，男生可以用髮蠟梳向側後方，令頭髮望落光滑而貼服。唔少荷里活靚仔演員都 Gel 呢個英倫風髮型，感覺斯文帶點紳士風！

七分復古油頭 - Credits to styleoholic

9. 男士蓬鬆油頭造型（Pompadour）

「 蓬鬆油頭 」係「 飛機頭 」嘅變奏版。頭兩邊輕微剷青，中間頭髮比較豐厚。稀疏同較幼嘅髮絲可以逆向搽上髮蠟，令頭髮蓬鬆。如果你腮骨同眉骨天生較直，臉形又如亞洲人般扁平，亦可透過飛機頭突出五官輪廓，以靚仔髮型營造年輕俊朗嘅感覺（立即變型又得，得咗！）。

Credits to menshairstylesclub

10. 漸變男士短髮造型（Fade）

「 漸變短髮 」屬於比較大眾化嘅男士短髮造型，相對於其他男性髮型（例如鏟青髮型、中長髮型、all back），漸變短髮（Fade）較容易配襯唔同面型，突出耳仔同下巴弧線。呢個男士短髮髮型有清新爽朗、乾淨俐落嘅感覺，怕熱、愛運動嘅男仔，就最適合喺夏天剪呢個髮型！

漸變男士短髮造型 - Credits to Men’s hair

11. Short Back 男士短髮造型

Short Back 其實係 All Back 短髮造型版本，頭髮從後面睇較短，從前面睇較有份量感，側面就睇到頭髮流線型變化。Short Back 較重視層次感，帶有 All Back 頭嘅感覺，所以睇落時尚型仔之餘，亦畀人清新嘅感覺 。

Short Back 男士短髮造型 Credits to Style and Designs

12. Undercut 男士短髮造型

Undercut 冇一個正式中文譯名，但意思係指將頭髮兩側剃掉，留住頂部頭髮。Undercut 特色係簡潔同百變，按個人頭髮長度同厚度，可以做出幾款潮流男士髮型，夏天亦可以將長髮剪短，保持清爽。

Undercut 男士短髮造型 - Credits to homensquesecuidam

13. 男士武士頭（Top Knot）

「男士武士頭」源於日本江戶時代，即將頂部頭髮拉後扎起，其他頭髮則剃光或剷平。「男士武士頭」髮型特色較有男士氣概，不過唔係所有男性（特別係亞洲人）都適合剪依類男生髮型。

如果想剪 Top Knot 男士武士頭，皮膚白嫩同圓臉男士，就可能比較唔太適合啦！

男士武士頭 - Credits to SOS Solteiros

14. 男士丸子頭（Man Bun）

唔止女人先可以 Set 丸子頭，男仔都可以㗎！長髮男仔可以將頭髮向後梳，係正中間位置盤起頭髮，就可以整到「丸子頭」。記得整男士丸子頭，要保持頭髮蓬鬆，先能夠帶出浪子不羈感覺！

小小分享：如果男仔想睇落高啲，扎髮髺視覺上會帶幫助！

男士丸子頭 - Credits to Style & Design